Безнең батырлар: Виссарион Канашев

Виссарион Канашев 1949 елның 12 декабрендә Питрәч районы Иксуар авылында туган.

Беренче тапкыр урта мәктәпне тәмамлаган елны, ике авыл сабантуенда майдан тоткан. Канашевлар – алты бертуган, беренче булып аларның Алексей абыйлары Питрәч якларында көрәшеп, якын-тирә авылларда батыр кала башлаган.

Совет армиясе сафларында хезмәт итеп кайтканнан соң, Виссарион Канашев алтынчы автоколоннага шофер булып эшкә урнаша. Шушы елларда алар семьялары белән Казандагы Нагорный бистәсенә урнашып, шушында яши башлыйлар. Виссарион Канашев Казаньхимстрой трестында, җәмәгәть тренеры Гайнетдин Мөхәммәдиев җитәкчелегендә көрәш белән шөгыльләнә башлый.

Физик яктан нык булуы, көрәш алымнарын җиңел ясау аркасында, Висарион Канашев күп җиңүләргә ирешә. Ул дүрт тапкыр Казанның Киров районы, шулай ук Идел буе һәм Бауман районнарының берләштергән сабантуйларында, аннары Вахитов белән Совет районын берләштергән сабантуйларында абсолют батыр дип таныла. Шулай ук үзләренең Питрәч районы авыл сабантуенда, Мамадыш, Балык Бистәсе, Арча, Әтнә, Мамадыш районнары сабан туйларында, Киров олкәсенең Малмыж авылы сабантуенда дистәләрчә еллар буенча мәйдан тота. Татарстан һәм Россия чемпионы исеменә ул биш тапкыр лаек була.

Алтмыш яше тулыр алдыннан 2010 елда вафат булды уд. Канашевны иптәшләре үзенең туган авылына алып кайтып җирләделәр.

Безнең батырлар: Әсхәт Фахретдинов

Әсхәт Фахретдинов 1951 елда Чүпрәле районы, Кече Чынлы авылында, тракторчы Гаяз ага һәм аның тормыш иптәше Гөлҗихан апаның күп балалы гаиләләрендә туа. Ул көрәш белән 27 яшендә генә шөгыльләнә башлаган, аны авыр үлчәүдә көрәшергә кеше кирәк булган өчен генә чакырганнар. 1979-1981 елларда Россия чемпионы дигән мактаулы исемне алуга ирешә. Ике тапкыр Татарстан чемпионы булып таныла.

Әсхәт Фахретдиновның иң зур танылуы 1980 елда Татарстанның абсолют батыры дигән исемне дәгъвалап көрәшкәндә була. Бу турнирда барлык Татарстанның авыл, район һәм шәһәр сабантуйларында батыр калган утыз ике көрәшче келәмгә чыга. Аларны ике төркемгә бүлеп көрәштерәләр, 90 кг көрәшчеләр арасында беренчелек өчен көрәш Максим Васильев, Салават Юсупов, Гайса Шакиров, Әүхәт Мөхәммәдиев, Әнвәр Гыйлаҗев һәм Илгиз Гайнуллин арасында бара. Финалда Илгиз Гайнуллин белән Әнвәр Гыйлаҗев очраша, Илгиз Гайнуллин көндәшен баш аркылы атып, 90 кг арасында җинүне яулый.

Авыр үлчәүдәгеләр арасында Нурсил Галиев, Сабирҗан Шакиров, Рафис Насибуллин, Фоат Валиуллин, Әсхәт Фахретдиновлар бил алыша. Финалда Әсхәт Фахретдинов, Рафис Насибуллинны отып, авыр үлчәүдәгеләр арасында җиңүче була. Татарстанның абсолют батыры Илгиз Гайнуллин белән Әсхәт Фахретдинов арасындагы көрәштә ачыклана. Фахретдинов көндәшен җиңеп зур җиңү яулый, бөтен Татарстанга таныла.

Безнең батырлар: Әхәт Закиров

Әхәт Закиров 1928 елда Арча районы Наласа авылында туган. Малай чактан ук, сабантуйларда көрәшә башлаган. Әхәт килмичә, сабантуй көрәшән башламыйлар иде, дип искә алганнар аның турында.

Әхәт Закиров бер үк вакытта бик көчле һәм эшлекле кеше булган. Хәрби хезмәттән соң, ул башта шофер булып эшли, аннары аның тырыш булуын күргәннән соң, үзен шушы оешманың колонна җитәкчесе итеп куялар, һәм ул анда утыз алты ел эшли.

Әхәт Закиров, яхшы эшләү белән беррәттән, спорт залга тренировкыга да йөри. Ул үзенең туган авылы Наласа һәм якындагы авылларда – Олы Әтнәдә, Яңа Кенәрдә, Шушмабашта, Арчада, Казан сабантуйларында егерме ел давамында мәйдан тота. 1954 елның җәендә, авыллардан, район үзәкләреннән бил алышырга барлык батырларны Казанга чакырып Республика Татарстаның абсолют чемпионын билгелиләр. 82 кг Әхәт Закиров Минзәләдән килгән керәшен егетен – 114 кг Остроумовны егып Республика Татарстаның абсолют батыры дип таныла.

1997 елда, аны якташлары туган авылы Наласага чакырып, Әхәт Закиров исемендәге бүләкләр булдырып, зур көрәш бәйгесе оештыралар.

Ул 1999 елда бакыйлыкка күчте. Казанның Мирный бистәсендә күмелгән.

Әхәт Закиров турында авылдашы Рөстәм Галиуллин «Әхәт батыр» дип аталган хикәя дә язды. Алдагы язмада шул хикәяне тәкъдим итәрбез.