Безнең батырлар: Васил Гарифуллин

Васил Гарифуллин 1948 елның 12 гыйнваренда Балтач районы Борбаш авылында туган. Көрәш белән ныклап Әлмәт физкультура техникумында укыганда, 1960 елларда шөгыльләнә башлаган.

1968 елда, туган авылына кайтып, Татарстанда беренчеләрдән булып, мәктәп спортзалында балалар һәм яшьләр арасында көрәш секциясен оешытырп җибәрә. Аның шәкертләре арасында зур уңышка беренче Фидаил Шакиров ирешә. Башта ул яшь үсмерләр арасында Татарстан һәм Россия чемпионы булып таныла, 1972 елда унсигез яшьлек егет өлкәннәр арасында Россия чемпионы булып кала.  Фидаил Шакировның бу зур уңышка ирешүгә, көрәшкә тартуга яшьләргә зур этәргеч бирә.

Алдагы елларда аның шәкертләре арасында Хәмит Кәримуллин, Вагиз Фазлиев, Котдус Зарипов, Рафис Шарифуллин, Тәбрис Маннапов, Сәйдәш Максумов һәм башка авыллардан килеп өйрәнгән Дамир Сафиуллин, Рафис Насыбуллин, Рифкат Хусаинов һәм башкалар берниче тапкыр Татарстан белән Россия чемпионы, герой-шагыйрь Муса Җәлил призына берничә тапкыр хуҗа булдылар.

Татарстанның иң дәрәҗәле герой-шагыйрь Муса Җәлил турнирында 13 тапкыр, шушы Балтач районы көрәшчеләре чемпион булып калдылар. Монда Васил Гарифуллинның тырышлыгы чиксез зур. Ул Борбаш авылыннан ундүрт спорт остасы әзерләде. Ул Татарстан укытучыларының атказанган дигән мактаулы исеменә лаек булды.

Васил Гарифуллин истәлегенә туган ягында көрәш турниры уздырыла.

Безнең батырлар: Максим Васильев

Васильев Максим Петрович 1956 елда 23 ноябрьдә Зәй районының Иске Зәй авылында туган. Татар көрәше белән ныклап хәрби хезмәттән соң шөгыльләнә башлый. Аның зур көрәшче булып формалашуында Илфат Имамеев белән физика һәм математика укытучысы Исмәгыйль Баязитов кебек тренерларының роле зур.

Исмәгыйль Баязитов Зәй көрәшчеләре арасында аерым урын алып тора. Ул 1972 елда герой-шагыйрь Муса Җәлил призын 80 кг көрәшчеләр арасында беренчелекне алды. Зәй сабантуйларында алты тапкыр батыр калды. Чаллы сабантуенда авыр үлчәүдә дөнья чемпионы Хәбил Бикташевны отып, аны бүләксез калдырды. 1980 елда үз машинасы белән автомобиль һәләкәтенә эләгеп улә.

Максим Васильев Казан төзүче-инженерлар институтын тәмамлады. Татарстан күләмендә үткәрелә торган ярышларда һәм турнирларда егерме биш ел дәвамында бил алышты. Герой-шагыйрь Муса Җәлил призына өч тапкыр, Татарстан чемпионлыгына өч тапкыр һәм Россия чемпионы дәрәҗәсенә ике тапкыр иреште. Әлмәттә уздырыла торган халыкара турнирда җиңүче булып калды. Ул бик күп тапкырлар Зәй һәм Чаллы районы сабантуйларының җинүчесе. Шулай ук якын-тирә районнарда – Сарман, Мөслим, Тукай һәм Түбән Кама сабантуйларында бик күп тапкыр батыр булып таныла. Ул көрәш буенча Татарстанның атказанган спорт остасы.

Бүгенге көндә алтмыш биш яшендә, Зәй районында агрофирма җитәкчесе булып эшли.

Безнең батырлар: Наил Хәмидуллин

Наил Нурулла улы Хәмидуллин 1962 елда Биектау районы Ямәширмә авылында туган.

1979 елда урта мәктәпне алтын медаль белән тәмамлаган. 1984 елда Казан авыл хуҗалыгы институтының механизация бүлеген кызыл диплом белән тәмамлаган. Мәктәптә укыган елларда ук яшьтәшләре белән авыл сабантуйларында көрәшә башлаган. Институтка укырга кергәч, татарча көрәш белән ныклап шөгыльләнә башлый. Ул өч тапкыр Татарстан чемпионы, ике тапкыр Россия чемпионы һәм ике тапкыр герой-шагыйрь Муса Җәлил исемендәге турнирда җиңүгә ирешә. Күп тапкырларын авыл сабантуйларында батыр кала, Биектау районының үзендә, 1983 елда абсолют батыр булып таныла. Шулай ук Казанның Совет һәм Вахитов районы белән Идел буе Бауман районы сабантуйларында, үз үлчәү авырлыгында, берничә тапкыр җиңүче була.

Институтны тәмамлагач Наил Хәмидуллин Биектау районының “Ленин” исемендәге колхозында баш инженер була, аннары комсомолның беренче секретаре, соңрак колхоз рәисе булып эшли. Биектау районы Усад авылының профессиональ техник училищасы директоры була.

Бүгенге көндә Казан аграр университетының проректоры булып эшли. Март аенда узенең 60 еллык юбилеен билгеләп үтте.