Безнең батырлар: Наил Хәмидуллин

Наил Нурулла улы Хәмидуллин 1962 елда Биектау районы Ямәширмә авылында туган.

1979 елда урта мәктәпне алтын медаль белән тәмамлаган. 1984 елда Казан авыл хуҗалыгы институтының механизация бүлеген кызыл диплом белән тәмамлаган. Мәктәптә укыган елларда ук яшьтәшләре белән авыл сабантуйларында көрәшә башлаган. Институтка укырга кергәч, татарча көрәш белән ныклап шөгыльләнә башлый. Ул өч тапкыр Татарстан чемпионы, ике тапкыр Россия чемпионы һәм ике тапкыр герой-шагыйрь Муса Җәлил исемендәге турнирда җиңүгә ирешә. Күп тапкырларын авыл сабантуйларында батыр кала, Биектау районының үзендә, 1983 елда абсолют батыр булып таныла. Шулай ук Казанның Совет һәм Вахитов районы белән Идел буе Бауман районы сабантуйларында, үз үлчәү авырлыгында, берничә тапкыр җиңүче була.

Институтны тәмамлагач Наил Хәмидуллин Биектау районының “Ленин” исемендәге колхозында баш инженер була, аннары комсомолның беренче секретаре, соңрак колхоз рәисе булып эшли. Биектау районы Усад авылының профессиональ техник училищасы директоры була.

Бүгенге көндә Казан аграр университетының проректоры булып эшли. Март аенда узенең 60 еллык юбилеен билгеләп үтте.

Рөстәм Миңнеханов көрәшчеләргә дәүләт бүләкләре тапшырды

Татарстан Президенты Рөстәм Миңнеханов бүген республика үсешенә зур өлеш керткән шәхесләргә дәүләт бүләкләре тапшырды.

«Ватаным Татарстан» газетасы язганча, алар арасында көрәшчеләр дә бар.

“Милли көрәшне популярлаштыруга зур өлеш кертүе, күпьеллык нәтиҗәле хезмәте һәм актив иҗтимагый эшчәнлеге өчен хезмәт ветераны, «Чаллы шәһәре көрәш федерациясе» җирле иҗтимагый оешмасы әгъзасы Хәмитов Рәкыйп Хатип улы «Татарстан Республикасы алдындагы казанышлар өчен» ордены белән бүләкләргә», – диелә Татарстан Президенты Рөстәм Миңнеханов имзалаган указда. Бүләкне бүген Казан Кремлендә узган тантанада тапшырдылар.

Рәкыйп Хәмитов – көрәш буенча Россиянең – өч, Татарстанның ике мәртәбә чемпионы. Атказанган спорт остасы. Чаллы Сабан туйларында 18 мәртәбә баш батыр булып калган шәхес. Быел июль аенда 70 яшьлеген бәйрәм итте.

Бүләкләнүчеләр арасында Хәбил Бикташев та бар.

Котлыйбыз!

Безнең батырлар: Әүхәт Мөхәммәдиев

Мөхәммәдиев Әүхәт Сәлим улы 1958 елда Кама Тамагы районының Яшелчә авылда дөньяга килгән.

Башлангыч белемне үз авылында алгач, ул укуын үзләренең авылыннан 10 км ераклыктагы Олы Салтык авылында дәвам иткән. Көн саен ике арадагы 10 км араны, барып кайтып йөргән. Ул үзенең көрәшчелек сыйфатларын ике арада йөреп туплаган.

1979 елда Совет армиясе сафларында хезмәт итеп кайткач, колхозга тракторчы булып эшкә урнаша. Ул вакытта колхоз рәисе булып Гатин Ринат Гомәр улы эшли. Гәүдәгә таза егетне күреп алып, ул аңа көрәш белән шөгыльләнергә тәкъдим итә, ул үзе дә элекеге көрәшче була. Һәм алар бергәләп күнегүләр ясый башлыйлар.  Әүхәт ул елны үзләренең авылында һәм Кама Тамагында район батыры булып кала.  Шул ук елны Әүхәт Лаешта авыл хуҗалыгы техникумына укырга керә. Уку белән беррәттән, кичләрен көрәш белән шөгыльләнә. Татарстанда үтә торган көрәш ярышларында катнаша башлый. Аннан соң 1981 елда герой-шагыйрь Муса Җәлил исемендәге призга авыр үлчәүдәге көрәшчеләр арасында җиңүче була. 1983-1985 елларда июль аенда Татарстанда үткәрелә торган ярышта баш батыры була торган. 1984 елда Татарстанда татар көрәше буенча чемпион була. Ул Татарстанның ике тапкыр баш батыры булып таныла, 1982 елда авыр үлчәдә Россия чемпионы булып кала. Үзләренең Кама Тамагы районындагы авылларда, Кама Тамагының үзендә, күрше Тәтеш районы авылларында күп тапкырлар батыр булып кала. Шулай ук ул Казанның Идел буе һәм Киров районы сабантуйларында баш батыр булып таныла.

Бүгенге көндә ул Кече Салтык авылында яши, балалар белән яшь үсмерләрне көрәш серләренә өйрәтә, тренер булып эшли.