Безнең батырлар: Фәрит Шәйхетдинов

Фәрит Сәгыйтдин улы Шәйхетдинов 1954 елда Яшел Үзән районы Карахуҗа авылында туган. Ул мәктәптә укыган яшьләрдән ук спортның күп төрләре белән шөгыльләнеп үскән. Фәрит урта мәктәпне тәмамлагач, Казан дәүләт педагогия институтының физик тәрбия факультетына укырга кергән.

Институтта укыган елларда ул ныклап классик көрәш белән шөгыльләнә. Укыган елларында Татарстанның бик күп төрле турнирларында чыгыш ясаган, шул вакытта татарча көрәш белән дә даими шөгыльләнгән. Институтны тәмамлагач Фәрит Яшел Үзән районының Олы Яке авылы мәктәбенә физкультура укытучысы булып урнашкан. Шушында ул авыл яшьләрен һәм мәктәп укучыларын туплап, көрәш түгәрәген оештырган.

Аның укучылары арасында: Фәрит Бикмуллин, Илһам Сафиуллин, Ленар Абдрахманов, Илдар, Илгиз һәм Зөфәр Гайнуллиннар кебек яшьләр Татарстан чемпионнары булып танылдылар.

Фәрит Шәйхетдинов шул вакытта эшләгән елларда, Яшел Үзән районының командасын туплап, аларны Казанда үтә торган герой-шагыйрь Муса Җәлил турнирына алып барды. 1978 елның район командасы: 60 кг үлчәүдә Әгъзам Гобәйдуллин, 70 кг үлчәүдә Илгиз Гайнуллин, 80 кг үлчәүдә Фәрит үзе, 90 кг авырлыкта Госман Хөсәенов һәм авыр үлчәүдә Әнсәр Галавиев составында, ярышлар тарихында беренче тапкыр чемпион дәрәҗәсенә ирешеп җиңү алды.

Фәрит Шәйхетдинов үзе 1977 елда герой-шагыйрь Муса Җәлил призына хуҗа була, өч тапкыр Татарстан чемпионы һәм бер тапкыр Россия чемпионы дәрәҗәсенә ирешә. Ул елларда абсолют беренчелек өчен үткәрелә торган турнирда, үз үлчәү авырлыгында дүрт тапкыр җиңүгә ирешә.

Аннан соң ул Татарстанның Яшел Үзән, Биектау һәм Казанның Киров районы Сабан туйларының батыры.

Бүгенге көндә “Ак Барс” Көрәш сараен генераль директоры урынбасары булып эшли, көрәшчеләр әзерләүгә үзеннән бик зур өлеш кертә.

Безнең батырлар: Илгиз Гайнуллин

Илгиз Юныс улы Гайнуллин 1959 елның 17 октябрендә Яшел Үзән районы Карагуҗа авылында туган. Ул татарча көрәш белән мәктәпнең кече классларыннан ук физкультура укытучысы, Татарстанның атказанган тренеры Фәрит Шәйхетдинов җитәкчелегендә шөгыльләнә башлаган. Урта мәктәпне тәмамлагач, Казан дәүләт педагогия институтының физик тәрбия факультетына укырга кергән. Илгиз институтта укыган елларында татарча көрәш белән генә түгел, ә классик көрәш белән дә шөгыльләнә.

Унтугыз яшендә ул иң дәрәҗәле ярышта – герой-шагыйрь Муса Җәлил турнирында беренче тапкыр җиңүгә ирешкән. Бу турнирда ул барлыгы дүрт тапкыр җиңүче була. Моннан ары ул ике тапкыр Татарстан Республикасы чемпионы, Казанның Киров районы сабантуенда дүрт тапкыр баш батыр булып таныла. Шулай ук Яшел Үзәндә биш тапкыр абсолют батыр, Казанның Совет һәм Вахитов районнарының берләштергән сабантуенда батыр була. Бик күп тапкыр Яшел Үзән, Питрәч, Балык Бистәсе, Лаеш һәм авыл сабан туйларында батыр булып таныла. Бүгенге көндә Илгиз Гайнуллин Яшел Үзән шәһәрендә “Үзәк” спорт комплексында балаларны һәм яшьләрне көрәш серләренә өйрәтә, тренер булып эшли.

Данил Юныс улы Галиев 1948 елның 10 августында Биектау районы Татар Әйшәсе авылында туган. Кече яшьтән үк Сабантуйларда көрәшеп үскән. Тугызынчы классны бетергәндә үз авыл сабантуенда батыр калган. Сигезенче классны тәмамлагач, Чистай совхоз техникумына укырга кергән. Шушында ул тәҗрибәле тренер Мәгас Сәхәбетдинов җитәкчелегендә көрәш белән шөгыльләнә башлаган. Татарча көрәш белән даими шөгыльләнүдән тыш, ул классик көрәшне дә үз итте. Данил Галиев классик көрәштән СССР – ның спорт мастеры.

Данил Галиев татарча көрәш буенча унике тапкыр Татарстан чемпионы, тугыз тапкыр Россия һәм биш тапкыр герой-шагыйрь Муса Җәлил исемендәге призга хуҗа булган көрәшче. 1979-1980 елларда ул Татарстанның баш батыры булып кала. 1976 елда Россиянең абсолют батыры була. Аннан тыш, ул үзбәк көрәше буенча спорт остасы, Үзбәкстан шәһәрендә узган ачык чемпионатта абсолют батыр булып кала. Аннан соң Түбән Кама, Әлмәт, Чаллы һәм Казан шәһәрендә үткән көрәш турнирларның авыр үлчәүдә абсолют чемпионы булып танылды. Арча, Биектау, Түбән Кама, Чаллы, Казан шәһәре сабан туйларының һәм  бик күп Татарстанның авыллары белән күрше Киров өлкәсенең Малмыж авылы сабантуенда дистәләрчә мәйдан тоткан пәһлеван. Данил Галиев татар көрәше тарихына алтын хәрефләр белән кереп калган легендар көрәшчеләрнең берсе.

Түбән Камада ел саен Данил Галиев истәлегенә көрәш турниры уздырыла.